聖公會秘書長：同志唔係怪物


【本報訊】平權之聲，依舊熾熱。平等機會委員會新主席周一嶽是英國聖公會信徒，承認該會在同志議題上作風保守，香港聖公會教省秘書長管浩鳴牧師直言教會內對反性傾向歧視立法未有共識，個人不反對政府進行諮詢，但認為立法非唯一途徑。對於有宗教團體擔心立法後出現逆向歧視，管浩鳴認為教會只是宣講真道，不憂慮為義下獄，又認為同性戀不是孌童癖，因為性傾向而拒絕聘用同志當教師的做法不恰當。
記者：張嘉雯                                                                        
                                        周一嶽上任一個月，表示可考慮為宗教團體制訂豁免條文，以換取各教會支持。本報專訪管浩鳴，他不反對政府進行諮詢：「所謂諮詢即係有一個傾談嘅空間，畀成個社會去了解件事，教會唔贊成歧視。」但他認為，立法以外尚有很多空間：「立法係咪唯一嘅方法呢？單係用法例叫人唔好做錯事，係消極嘅方法，啲人心底仍然係歧視佢哋，最重要係大家對同性戀者多啲認識，佢哋唔係咩洪水猛獸，唔係咩怪物。」
                                                                     



                                                                                                                                                                                                                                                                                                         毋須過慮逆向歧視                                         教會雖在反歧視法上未有共識，但他說對同性婚姻有一致立場：「有一啲底線要守住，教會唔會同意同性婚姻，婚姻係一男一女，婚姻以外嘅關係，我哋可以另外訂一個名畀佢。」他表示不會刻意向周一嶽表達觀點，又透露個別教會團體曾游說香港聖公會就立法一事表態，但該會沒有答允。
對於有宗教團體引用教會學校不聘用同性戀者當教師、不為同性戀者主持婚禮等例子，擔心立法引發逆向歧視，管浩鳴認為毋須過份憂慮：「教會講婚姻係一男一女，係講真理，如果為基督真道嘅緣故而要坐監，咁就抵啦，我唔擔心。」他亦不認為拒絕為同志主持婚禮會招來官非：「𠵱家教會都唔會幫離咗婚嘅人主持婚禮㗎，政府告我哋，我哋歡迎，我哋都有底線，宗教有自主，教會都有自己嘅立場，要保守返基本嘅信念。」
                                                                     



                                                                                                                                                                                                                                                                                                         社會對同志多誤解                                         對於學校不聘用同性戀者當教師，管浩鳴認為不應以有色眼鏡看待同志：「首先我哋唔應該將同性戀者等同孌童癖，唔應該因為佢係同性戀，就當佢哋冇晒道德標準，咁對佢哋好唔公平，咁即係男先生唔可以教女校？講真係咪同性戀，都唔應該孌童㗎啦。」他認為社會對同志仍很多誤解：「太多唔好嘅嘢同佢哋拉上關係，好似愛滋病、濫交、孌童癖咁，可能有啲係個別嘅問題，但唔好完全歸咎於同性戀。」
談到同志家庭的領養議題，管浩鳴有信心政府不會輕率而行：「政府要平衡，保障同性戀者嘅基本權利唔受歧視，但亦唔等於可以完全開放，例如我作為牧師，我去領養一個小朋友都係唔得㗎，咁係咪歧視我呢？小朋友應該由傳統家庭去領養，有時係我哋諗得太多，擔心得太多，其實我哋個社會比我哋想像中嚴謹，我自己唔擔心。」                                                                                                                     

http://hk.apple.nextmedia.com/news/art/20130502/18246851